addisnews

I'm standing for real freedom. I regard freedom of expression as the primary right without which one can not have a proper functioning democracy.

ሰማቹህ ወይ መርዶ (ሠዓሊ አምሳሉ ገ/ኪዳን አርጋው)

POOO
ሰማቹህ ወይ መርዶ ? ሀገር ተገምድሎ
ሰማቹህ ? ወይ ነዶ!! ፤ ካገርህ ተከፍሎ
ሀገርህ ተቆርጦ ፤ ለሱዳን ተሰጠ
መንግሥት ነኝ ባለው ፤ ራሱን ባስቀመጠ
ብለው ሲያወሩልኝ ፤ መንፈሴ ተናጠ
አንጎሌ ተናጋ ፤ አቅሌ ተናወጠ
ብርድ ብርድ አለኝና ፤ እያቅለሸለሸ
ወይ ወደላይ አይል ፤ እንዲሁ እያሸ
ባዕድ የሆነ ስሜት ፤ ሲያውከኝ አመሸ
አሳድሮ አዋለኝ ፤ ሰንብቶም አልሸሸ
ይሄን የሀገር ክህደት ፤ ይሄን የሞት ዜና
ሙሾ ልጻፍለት ፤ ብየ ተነሣሁና
ወረቀት ብዕሩን ፤ ካለበት አንሥቸ
ለታሪክ ለትውልድ ፤ ከትቤ ላልፍ ትቸ
ከዚህች ቀን በፊት ፤ በሀገሩ ታሪክ
እንደዚህ ያለ ጉድ ፤ እንዲህ ያለ መታወክ
በገዛ መንግሥቱ ፤ ለባዕድ ሲበረከት
ሽንጥ ገትሮ በሐሰት ፤ ለባዕድ ሲሟገት
ገጥሞት አያውቅምና ፤ ብዕሩ ተቸገረ
ተጨነቀ ራደ ፤ እንባ አቀረረ
ጉሮሮው ላይ ድንገት ፤ ሳግ ተሰነቀረ
ቀለም ማውጣት ማፍለቅ ፤ አቅቶት አቋረጠ
ወረቀቱም ጮኸ ፤ ኡኡ አለ አመጠ
ከቶ እንዴት አድርጌ ፤ ይሄን እችለዋለሁ ?
ሙሉ የእድሜ ዘመኔን ፤ ተሸክሜ አድራለሁ ?
ብዕሩ ወረቀቱ ፤ እንዲህ ቢቸገሩም
ጨክኜ አስጨንቄ ፤ ግድ ባስጽፋቸውም
በቁጣ ነድጀ ፤ በእልህ ተነሥቸ
ብጽፈው ብጽፈው ፤ ብለው ተደፍቸ
የደረሰብንን ፤ የክህደት ናዳ
የእብደቱን ፍጻሜ ፤ የጉድ ውርደት ዕዳ
የሰብእናውን ዝቅጠት ፤ ጭሉም ድንቁርና
የዜግነቱን ክሽፈት ፤ ከንቱ መሆን መና
የነውሩን ልክ ማጣት ፤ የቁሸቱን ብስና
የሐበሻነት ፍን ደም ፤ እንደሌለው ዳና
ልቡ ውስጥ እንደሌለች ፤ የሀገር ሥዕል ልቀት
ለሕዝብ ለወገን ፤ ነገ የሚባል ምኞት
አጥፍቶ ለመጥፋት ፤ ብቻ ያለውን ቅዠት
የአሸባሪነቱን ፤ ተወልዶ ያረጀበት
የእፉኝት ልጅነት ፤ የጠላትነቱን
አቻ ተስተካካይ ፤ ምሳሌ አልባነቱን
አልገልጽልኝ አሉ ፤ ያሉ ሁሉ ቃላቱ
ዐቅም አነሳቸው ፤ ብዕሩ ወረቀቱ ፡፡
ተው ስማኝ ሀገሬ ፤ ተው ስማኝ ሀገሬ
ባንተ ነበር እኮ ፤ እስካሁን መኖሬ
የታሪክ አተላው ፤ በሀገር የጨከነ
ለምንም ምን ቢሆን ፤ ነውና ያልታመነ
ከእስካሁን ግብሩ ፤ ሲሆን እንዳየነ
ወገቡን አጥብቆ ፤ ተግቶ እየማሰነ
ሥራ የሚሠራው ፤ ለባዕድ ስለሆነ
ሉዓላዊነትክን ፤ እየደፋፈነ
ብሔራዊ ጥቅምን ፤ ቅርጫ እየተመነ
አንተንም ከመሸጥ ፤ እያፈናቀለ
እንደማይመለስ ፤ ዐውቀህ እንዳበለ
ሀገር የሚያስበጣጥሰው ፤ የያዘው አባዜ
የቀረውን ሰጥቶ ፤ ሳይጨርስ ይሄን ጊዜ
ይሄ ሁሉ ድርጊት ፤ አስረጅ ስለሆነ
እንደበግ ነድቶ ፤ ሳይሸጥህ እየጫነ
ተነሥ በቃ በለው ፤ መቸም ድኖ አልዳነ ፡፡
የቅኝ ግዛት ውል ፤ እኛን እንዲገዛ
ነው የሱ ፍላጎት ፤ ሁከት እንዲበዛ
ታዲያ ፍላጎቱ ፤ ከሆነ እንደዛ
ዓባይ መገደቡ ፤ ውሸት ነዋ ዋዛ ?
ሊያታልልህ ነዋ ፤ ሊያደክም በብዝበዛ ፡፡
ያ የምንኮራበት ፤ የነጻነት ጸጋ
ጥቅም አልባ ነዋ ፤ የከፈልነው ዋጋ ?
አይ ዞር በል ለማለት ፤ መስሎ ለማይታየን
የሐበሻነትን ደም ፤ ፈጥኖ ለሚያፈላብን
ሉዓላዊነትን ፤ ብሔራዊን ምንዳ
ለማስከበር እንጅ ፤ የነጻነት ፋይዳ
ለዚህ ለዚህ እማ ፤ ቅኝ ግዛት ምን ጎዳ ?
የእናት አባቶቻችን ፤ ደምና አጥንታቸው
ለምን ነበር ታዲያ ፤ የተከሰከሰው ?
በከንቱ ነበራ ? ድንበር ላይ የፈሰሰው ?
በቅኝ ገዥ ውል ፤ ከተስማማህማ
ገና ትሰጣለሀ ? የኢትዮጵያን ማማ ?
ሰሜን ደቡብ ምዕራብ ፤ ገጠር ከከተማ ?
ለእንግሊዝ ፈረንሳይ ፤ ለጣሊያን በፊርማ ፡፡
እንደ እነሱ መሻት ፤ ቢሆን ተጣጥሮ
ያሉትን እሽ እያልን ፤ ብንቀበል ኖሮ
ኢትዮጵያ እኮ የለችም ፤ ጠፍታለች ከድሮ
እንቢ ስላልን ነው ፤ አሻፈረኝ ለአውሬ
ነፍሴን እሰጣለሁ ፤ ለኢትዮጵያ ሀገሬ ፡፡
ሀገር ማለት ለኔ ፤ አይደለም መሬቱ
ሀገር ለኔ ሰው ነው ፤ ይሄ ነው እውነቱ
እያልክ የሰበከን ፤ ለዚህ እንደነበረ
ነግሬህ እኮ ነበር ፤ ይህችን እንዳሴረ
ገና ይቀጥላል ፤ ደሞ ለመከረ ፡፡
እሺ አንተ እንዳልከው ፤ ሀገር ማለት ላንተ
ሰው ማለት ከሆነ ፤ ወገን የታተተ
ስለ ሰዉ ስትል ፤ ሳትቸር ሳትፈራ
ከሚገዳደረው ፤ ሊያሰጥም በመከራ
ለምን ሳትቆምለት ? አለኝ ካልክ አደራ ?
ሳትፈነቃቅለው ፤ ከኖረበት ስፍራ ?
ምን ነውሳ ታዲያ ፤ ከገዛ እርሥቱ
ከኖረበት መንደር ፤ ካለበት እትብቱ
ከቀየው አፈናቅለህ ፤ አስቀረኸው ከንቱ ?
ለችጋር ሰጠኸው ፤ የሚያርሰውን አጥቶ ?
አሳልፈህ ልትሰጥ ፤ ላለው ተጎራብቶ ፡፡
ከገዛ ሕዝቡ ይልቅ ፤ ባዕድ የበለጠበት
·ረ ይሄ ምን ጉድ ነው ? አቅል ያሳጣው እብደት ?
ለዋለልህ ውለታ ፤ ለዚህ እንድትበቃ
መክፈልህ ከሆነ ፤ መጥቀምህ ላለቃ
ተው እንዲህ አይደለም ፤ ሀገር አይደል እቃ ?
ተው ለማንም አይበጅ ፤ ላንተም ነው ሰቆቃ
መዘዙ ብዙ ነው ፤ እንዲህ ያል እቃቃ
ባይሆን ገንዘብ ስጠው ፤ ካዝናችን አራቁተህ
ለምን ተብሎ አንልም ፤ ሁሉም ቃል ይግባልህ
መሬት ግን መሬት ነው ፤ ከቶ የማይተካ
ምድር ሀገራችንን ፤ አንዲት ጋት አትንካ ፡፡
አንተም ጎረቤቴ ፤ በቅኝ ገዥህ ሴራ
ተጠልፈህ ወድቀሀል ፤ መዘዝ ጣጣን ፍራ
ያኔ እንዲያ አጠላልፎ ፤ ሲሞክር ሊያስርልህ
ይመስልሀል እንዴ ? ላንተ አስቦልህ ?
ልብ ካለህ አስተውል ፤ እንዳይመስልህ ሊጠቅም
ስትደማ እንድትኖር ነው ፤ በግጭት ዝንተ ዓለም
ይህ ነውና ዓላማው ፤ ፈልግለት መላ
ቅኝ ገዥን ከጠላህ ፤ ሴራውንም ጥላ
የሰላም እጅ ዘርጋ ፤ ይፈር ቡሆው ገላ
ፊቱ እሳት ይምሰል ፤ ዐይኑ እንደ ደም ይቅላ ፡፡
የቆዳ ስፋትህ ፤ ከአፍሪካ አንደኛ
ያንተን ሲሦ ታክል ፤ ሀገር ይዘን እኛ
ያንተን ሦስት ጊዜ እጥፍ ፤ ሕዝብ ታጭቋል ክፉኛ
ምን ጨካኝ ብትሆን ነው ? ምን ያህል ስስታም ?
ባለህ አልረካ ብለህ ፤ ከኛ የሚያምርህ ደም ?
ሀበሻን ተፋቅረህ ፤ በደግ ጉርብትና
ብትኖር ነው የሚሻልህ ፤ እንድትዘልቅ በደኅና ፡፡
ከሞኝ ደጃፍ ሞፈር ፤ ይቆረጣል ላርሶ
ውኃየን በነጻ ፤ መጠጣቱ አንሶ
የተፈጥሮ እኮነው ፤ ብለው እያጃጃሉ
ከውኃ የከበረ ፤ ሌላ እንዳለ ሁሉ
ቀድተን እንውሰድ ቢሉት ፤ ከያዘው ግድቡ
እንደሚሰጥ ሁሉ ፤ ለሁሉ እንደልቡ ፡፡
ለተፈጥሮነቱ ፤ ለሱ ለሱ እማ
እንዲያ በመሆኑም ፤ ነጻ ከተሻማ
ያንተስ ያው አልነበር ፤ በቧንቧ ፈሳሹ
የነዳጅ ዘይትህ ፤ ዶላር አሳፋሹ ?
ማን ይሙትና አሁን ፤ ዓባይ የሚፈሰው
ከእናነንተ ወደኛ ፤ ቢሆን ኖሮ አቅጣጫው
ጠብታ ውኃ መንካት ፤ አልችልም ልቀዳ
ብለህ ትለቃለህ ? ሕዝብህ እየተጎዳ ?
እየተቸገረ ፤ በራብ በጥም ፍዳ ?
ነው ወይስ ትላለህ ፤ ቃልህን በማስገምገም
ሐበሽ እናዝናለን ፤ ለእኛም አልበቃንም
እያልክ ታፌዛለህ ፤ ከዚያው ከደጃቹህ
እንዲያዘንብላቹህ ፤ ዱአ አርጉ ወደ አላህ ?
ይሄን እንደምትል ፤ አልጠራጠርም
በገዛ ገንዘቤ ፤ ደርቀህ ያሲያዘህ ቂም
እንዲህ ያንጨረጨረህ ፤ ያረገህ ስስታም
ጭራሽ ያንተ ቢሆን ነው ? ዘራፍ ማለት ትተህ
ምን ደፋሮች ናቸው ? ሳትለን ተገርመህ
ጠብታ ሳትነካ ፤ መርጠህ መሆን ድሀ
ለእኛ ብለህ አዝነህ ፤ ሰጥተኸን በአምሀ
እኔ ልቸገር ብለህ ፤ የምትሰጠን ውኃ ? ፡፡
ታዲያ ውኃየን ወስደህ ፤ በገዛም መሬቴ
አርሰህ ስትበላ ፤ የእኔ አጥቶ አንጀቴ
ችጋር እየፈጀኝ ፤ ባዶ ሆኖ ቤቴ
ዝም ብየ የማይህ ፤ እንዴት ነው በሞቴ ?
ለዚህ ብልጠታቹህ ፤ ልክና ቅጥ ላጣው
በራስ ወዳድነት ፤ እጅግ ለታወረው
ለከት አብጁለት ፤ መጥፊያህ እንዳያደርገው ፡፡
ጭራሽማ እርሥቴን ፤ ሀገርማ ወስደህ
እሺ እሺ የሚልህ ፤ ዝቃጭ ባንዳ አግኝተህ
እንደምን በሰላም ፤ እንቅልፍ ተኝተህ
እናድራለን ብለህ ፤ ቅዠት አሳሰበህ ?
ወስደህ ላትወስደው ፤ ከነብር አፍ ሥጋ
በከንቱ ባትደክም ፤ ምናለ ባትፈጋ ?
ካላልክ በቀር ይባላኝ ፤ ልጥፋ ቀኔ አይንጋ ፡፡
ከሁለት ያጣ ሆነህ ፤ ከምትቀር ባዶ
ተው ተው ይሻልሀል ፤ መኖሩ ተዋዶ ?
መሬት አልቸገረህ ፤ ሞልቶሀል ጠፍ መሬት
ሕዝብህ አልጠበበው ፤ እንደኛ አጥቶ ጋት
ተው ልብ በል ፍራ ፤ አስብ ለወደፊት ?
ኋላ አይጥ ለሞቷ ፤ ይሆንብሀል ጥፋት
ነገ እኮ ወያኔ ፤ የለም ቋሚ ላንተ
ታጥቆ የሚጠብቅህ ፤ ሸር እየዶለተ ፡፡
ከሊቅ እስከ ደቂቅ ፤ ኢትዮጵያዊ ሁሉ
ለዚህ ነፍሱን የማይሰጥ ፤ እኔ እኔ እያሉ
ይኖር ይመስልሀል ? የማይጸና ቃሉ
ለእናት ኢትዮጵያ ፤ ቀልተው የማይቀሉ ?
ካልመለሰም በቀር ፤ ድንበር ካላጠረ
ከቶም አያርፍልህ ፤ እንደተደፈረ ፡፡
ይሄን ነው የምትሻው ? ዘለዓለም መታጨድ ?
ቀጠናው እንዲታወክ ? ሰላም አጥቶ እንዲነድ ?
ይሄንን ከሆነ ፤ ጠብቀን በል በርታ
ታውቀዋለህ ሐበሻን ፤ እንደማይለቅ ቃታ
የልቡን ሳያደርስ ፤ ሱሪ እንደማይፈታ ፡፡
ክፉ መካሪህን ፤ ቅኝ ገዥን አትስማ
ጎረቤት ይሻላል ፤ ከሩቅ ላንተ ልድማ ፡፡
የነበረን ፍቅር ፤ ያ የጠነከረ
በአንድ አሰልፎን ፤ ቱርክ እየሰበረ
እንዳልሆነ ሆኖ ፤ እንዴት እንደፈረሰ
አታስታውሰውም ? በእሷ ነው የረከሰ ፡፡
ዛሬ ይሄን እንዳቄልክ ፤ አባቱን አቂላ
ቅጥረኛ ሆኖላት ፤ አንተን ተበቅላ
እጅህ የገባውን ድል ፤ ከእጅህ አስጥላ ፡፡
ጥቅምና ጉዳትን ፤ በማሰብ አርቆ
ጉርብትናችንን ፤ ከሸር ጠብቆ
ካሳ እንዳደረገው ፤ በጥበብ እረቆ
መጠንቀቅ ሲገባው ፤ እንደመሪ ልቆ
በአሽከርነቱ ፤ ለፈቃዷ ወድቆ
ሁሌም አብረን ኗሪ ፤ ጎረቤት መሆንክን
እንደቀድሞው ደሞ ፤ አንድ አካልነትህን
መገንዘብ ተስኖት ፤ መያዝ ወዳጅነትህን
በካሳ እንዳረገው ፤ ገልጦ ባንዳነቱን
ምንም በማናውቀው ፤ እንተንና እኔን
ቃልኪዳኑ ፈርሶ ፤ ወዳጅነታችን
ደመኞች አድርገው ፤ አጣልፈው አስቀሩን ፡፡
ተበቅለኸውም ፤ መርሳት አቅቶህ ቂም
ታነፈንፋለህ ፤ ይሄው እስከዛሬም ፡፡
ያውም ገዳማችን ፤ እርእሰ እርእስ
ማኅበረ ሥላሴን ፤ ስንት የያዘውን ቅርስ
ያውም የቴዎድሮስን ፤ የዚያን ጀግና ቀየ
ይሄን ጉድ በሰማ ፤ ይሄን አጀብ ባየ
በነጋ በጠባ ፤ ተሻግሮ እያለፈ
የሚሰፍረውን ባዕድ ፤ እያሰፈሰፈ
እዚያው እየሄደ ፤ ሲያባርር ሲቀጣ
የአባቶቹን እርሥት ፤ ሊያስከብር እንዳናጣ
መድፍን በጎራዴ ፤ ገጥሞ አፍታ ሲያሳጣ
ያውም በሽፍትነት ፤ ዐጤ ሳይሆን ገብቶ
ከጥቂት ፋኖች ጋር ፤ ለኋላ ይሄን ፈርቶ
ጉድ ነው የጉድም ጉድ ፤ ዛሬ የሰው ጎደሎ
ከቶ የማይታሰብ ፤ ይደረጋል ተብሎ
ወገን ነኝ በሚል ፤ ግን ሳይሆን ተማስሎ
ቴዎድሮስ ያላሰበው ፤ ዛሬ በከሀዲ
ሲቋምጥ ለኖረው ፤ ለጠላት መሐዲ
ይግረምህ አሉና ፤ ጭራሽ የእትብት ምድሩን
ሊሰጡ አማራቸው ፤ እይ ድፍረታቸውን ፡፡
የለማ ቋረኛ ፤ የለማ ጎንደሬ
የለማ ሐበሻ ፤ የካሳ ዘር ፍሬ
ሀገር ሲነኩበት ፤ የሚሆነው አውሬ
አቅሉ የማያርፍለት ፤ ሳያርደው እንደበሬ
ያ መጠሪያ ስሙ ፤ የዳልጋ አንበሳ
ትንፋሹ የእሳት ላንቃ ፤ ደራጎን እንዳገሳ
እውነት ተሰልቧላ ፤ ሆኗላ እሬሳ ፡፡
amsalugkidan@gmail.com
dddd
ሠዓሊ አምሳሉ ገ/ኪዳን አርጋው
Source http://www.goolgule.com/
Posted by Addisu Wond.

Advertisements

Single Post Navigation

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: