addisnews

I'm standing for real freedom. I regard freedom of expression as the primary right without which one can not have a proper functioning democracy.

ኢትዮጵያዊቷን ለሞት ያበቃችው የኤምሬትስ ዜጋ የ15 ዓመት ተበየነባት

በዩናይትድ ዓረብ ኤምሬትስ የዱባይ ፍርድ ቤት የአገሩ ዜጋ የሆነች የቤት እመቤት፣ ኢትዮጵያዊቷን ሠራተኛ በማሰቃየት ለሞት በማብቃቷ የ15 ዓመታት የእስራት ቅጣት በየነ፡፡

ኢትዮጵያዊቷ ለሞት የበቃችው በግድ እንድትጠጣ በተደረገው ፀረ ተባይ መርዝ ምክንያት በደረሰባት ጉዳት መሆኑን፣ በኤምሬትስ የሚገኘው ገልፍ ኒውስ አስረድቷል፡፡

የኢትዮጵያዊቷን ማንነት ይፋ ያላደረገው የዜና አውታሩ፣ እንድትጠጣ በተገደደችው ፀረ ተባይ መርዝ ሳቢያ ከመቁሰሏም ባሻገር፣ ይኼው ተባብሶ የሳምባ ምች ስለያዛት ለህልፈቷ ምክንያት እንደሆነ ዘግቧል፡፡ የዱባይ መጀመሪያ ደረጃ ፍርድ ቤት በውሳኔው እንዳሰፈረው፣ የኤምሬትስ ዜጋ የሆነውች የቤት እመቤት ሠራተኛዋ ወዲያውኑ ተገቢ ሕክምና እንዳታገኝ በመከልከሏ ምክንያት ቁስሏ ተባብሶ ለሕልፈት አብቅቷታል ብሏል፡፡

አል ራሺዲያ ተብሎ በሚጠራው መንደር ነዋሪ የሆነችው ወንጀለኛዋ ሴት፣ ከኢትዮጵያዊቷ ባሻገር የ30 ዓመቷን ፊሊፒናዊት ሠራተኛ ምግብ በመከልከልና ለኑሮ በማይመች ጨለማ ክፍል ውስጥ በመቆለፍ ከአንድ ወር በላይ ማሰቃየቷን ፍርድ ቤቱ አስታውቋል፡፡ በዚህ አድራጎቷና ሦስተኛዋን የቤት ሠራተኛ በመግረፏ ምክንያት ተጨማሪ የአንድ ወር እስራትና የሁለት ሺሕ ድርሃም (የኤምሬትስ ገንዘብ) መቀጫ ዳኛው ኡርፋን ኦማር መወሰናቸው ታውቋል፡፡

የወይዘሮዋ ባለቤትም በተባባሪነትና በአመቻችነት ለፈጸመው ድርጊት የሦስት ዓመት የእስር ቅጣት ተበይኖበታል፡፡ ግለሰቡ ሠራተኞቹ የሚታጎሩበትን ምድር ቤት መስኮት በማሸግ ሚስትየው የምትፈጽመውን ድርጊት አግዟል ተብሏል፡፡

ይህም ሆኖ በወንጀለኛነት የተቀጣችው የቤት እመቤትም ሆነች ባለቤቷ ጥፋተኛ አይደለንም ሲሉ ተከራክረዋል፡፡ ባልና ሚስቱ በወንጀል ተጠያቂ እንዲሆኑ የወሰነው የዱባይ ፍርድ ቤት፣ በተለይ የቤት እመቤቷ ኢትዮጵያዊቷን ለሞት ከማብቃቷም በላይ፣ ሠራተኞቹ ራቁታቸውን ሆነው ትገርፋቸውና ጭንቅላታቸው እስኪደማ ድረስ ከግደግዳ ጋር ታጋጫቸው እንደነበር ፊሊፒናዊቷ መመስከሯን አስታውሷል፡፡

‹‹ባሏ ፍርድ ቤት እንደሚሠራ እየተናገረች እንደምታሳስረን ታስፈራራን ነበር፡፡ ገላችን እስኪሰነጣጠቅ ድረስ በዱላ ትገርፈናለች፡፡ ምግብ በአግባቡ አትሰጠንም፡፡ ለረጅም ጊዜም ትቆልፍብናለች፤›› ያለችው ፊሊፒናዊት፣ አብዛኛውን ጊዜዋን በዚህ ሁኔታ ስለምታሳልፍ ለዘመዶቿ ደውላ መናገር እንዳልቻለች ለፍርድ ቤቱ ተናግራለች፡፡ እመቤትየው የመፀዳጃ ቤት ዲቶል የተቀላቀለበት ውኃ እንድትጠጣ ታስገድዳት እንደነበር የገለጸችው ፊሊፒናዊቷ፣ መታጠቢያ ቤት ውስጥ እርቃናቸውን እንዲሆኑ በማድረግ ፎቶ እያነሳች ለጓደኞቻቸው እንደምትሰጥባቸው በማስፈራራት ጭምር ግፍ እንደፈጸመችባቸው ለፍርድ ቤት አስታውቃለች፡፡

በሌላ በኩል በሳዑዲ ዓረቢያ ፖሊሶችና ዜጎች ጥቃት ተፈጽሞባቸው በአሰቃቂ ሁኔታ የተገደሉ ኢትዮጵያውያን ፍትሕ አለማግኘታቸውና ጉዳያቸው እስካሁን ምን እንደደረሰ የሚታወቅ ካለመሆኑም በላይ፣ አሁንም ድረስ በርካታ ኢትዮጵያውያን ከሳዑዲ ዓረቢያ እየተባረሩ መሆናቸው ሰብዓዊ ክብርን የሚነካ እንደሆነ ሪፖርቶች እየገለጹ ናቸው፡፡
ሪፖርተር
Posted by Addisu Wond.

Single Post Navigation

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: